政情：魚蛋 腸仔 茶葉蛋 進駐立會
立法會受到「拉布」困擾，議員好多時都唔得閒出去食飯，只敢喺立法會宴會廳或到五樓咖啡室搞掂三餐。不過，立法會咖啡室通常得麵包、三文治或餐蛋麵呢啲簡單食物，想多啲選擇都唔得。行政管理委員會副主席梁君彥（Andrew）為咗同事口福，早前決定為咖啡室引入一系列車仔麵配料，大受議員歡迎。
梁君彥成功爭取
雖然咖啡室有熱辣辣嘅餐蛋麵供應，但如果議員趕時間開會，要食晒成碗麵又好麻煩。所以Andrew就建議咖啡室引入車仔麵配料，例如魚蛋、貢丸、腸仔及墨魚丸等，連茶葉蛋都有。呢啲食物勝在可以一早煮熟晒，一落柯打就有得食，又快又飽肚，方便班議員食幾啖就趕返落去會議廳投票。雖然車仔麵配料大受歡迎，但聽講有女議員覺得太過「麻甩」，好少叫呢啲食物，反而鍾情厚多士。