政情：柯創盛搞義工網聚 蝦碌百出
禁聚令延長，又要等多兩個禮拜先至可以恢復社交接觸。綽號柯仔嘅議員柯創盛，就鑑於無同地區義工聚會已經有一段日子，於是就趁住財政預算案討論嘅會議休會時間，同班地區兄弟、義工嚟一次網上聚會，不過佢對視像程式嘅操作似乎唔係咁純熟，搞到蝦碌百出。
首次舉辦 操作唔熟
話說柯仔尋日都係首次同義工搞網上聚會，面對電腦上陌生嘅操作介面，遙距網聚一開頭，就難免多甩漏喇，譬如有人睇唔到畫面，有人就無咗把聲，等到參與網聚嘅人全部都到齊，結果一人一句聲疊聲，到底想講乜嘢都完全聽唔清楚。結果要調試一段時間，大家先至可以順暢交流，分享近期嘅工作狀況。雖然話今次網上聚會係一次新嘗試，不過議員嘅時間好寶貴，下次未必有機會容許佢慢慢咁摸索程式嘅操作，柯仔對於科技方面嘅應用，實在要惡補一下喇。