隨着智能手機普及，手機應用程式（App）好似雨後春筍咁湧現。政府近年推出咗唔少App，但下載率就參差不齊，一啲受歡迎嘅App，好似「我的天文台」，下載次數超過四十七萬；相反部分App下載率竟然不足一百次。
人民力量議員陳志全（慢必）尋日喺立法會財委會特別會議上，提到政府App嘅成本效率問題，指近年好多政府部門都推出App，但下載率就好低，變相每次下載嘅成本好貴。佢舉例指，漁護署嘅App去年嘅下載率只有十次，今年先升至七百次；水務署去年四月曾經推出一個App，製作成本高達一百五十六萬元，但截至上月底，下載次數只有七千八百四十一次，即係下載一次要約二百元成本。
慢必直言搵番政府部門同事下載都唔止呢個數，建議下次可以搵多啲親戚朋友幫手，提高下載率。政府資訊科技總監林偉喬回覆話，當局有提供指引，亦不時舉辦分享會，方便各部門掌握要注意嘅地方。不過，照政府App現時嘅下載情況睇嚟，成效真係有待改善喇！