政情：今日你上鏡：胡志偉踩車用鴨記平頭盔

藝人吳若希媽媽日前於大埔炒單車重傷，令公眾再次關注踩單車嘅安全。平日不時以單車代步嘅立法會議員胡志偉話，自己架戰車雖然要三千幾蚊，但呢個價位喺市場上係普通貨色，強調最緊要係佩戴頭盔。不過，佢自爆單車頭盔係深水埗鴨寮街貨色，百幾蚊就有交易。其後佢又提及兩招踩單車心得，第一係落斜前要留意煞車系統有冇失靈，否則唔好亂衝落斜路；第二係一定要減速後先可以煞前轆，否則好容易凌空反車，到時着住任何裝備都會受傷。