佔領鬧劇搞到香港烏煙瘴氣，七國咁亂，全民陷入政治狂熱，民生議題無人問津。好似全民退保咁吖，研究報告唔經唔覺已經推出三個多月，政府無表態，政客無反應，社會無討論，直頭好似石沉大海咁。唔怪得有人擔心，搞到最後可能又係得個吉嘅咋。
唔係杞人憂天。曾經做過社署署長嘅扶貧委員會委員余志穩接受本報專訪時，批評港府對全民退保態度曖昧，擔心最終會「攤到凍晒」，不了了之。佢仲話，雖然扶委會已經決定就全民退保進行公眾諮詢，但完全冇重點，只係求求其其大包圍收集意見就算交差，質疑港府既冇決心亦冇時間表，根本喺度玩緊拖字訣。
點解港府一直龜縮？鬼咩，港府之所以委任學者研究全民退保，提出推行全民老年金建議，唔係因為有膊頭有承擔，而係因為社會討論咗幾十年，早就有共識，拖無可拖咪將個波大腳交畀學者囉。偏偏學者報告生不逢時，撞正佔領亂局，出爐之後坐冷板櫈，連撰寫報告嘅港大學者周永新都冇晒癮，大嘆心血白費。既然大家都唔關心咯喎，政府仲唔乘機推卸，翹埋雙手咩，所謂公眾諮詢，睇嚟都係走過場居多嘅喇。咁搞法，全民退保唔止「攤到凍晒」，直頭「攤到冇晒」都似。
不過話又講番轉頭，即使港府真係有心推動全民退保，以今時今日嘅政治環境，都係寸步難行，盞嘥氣嘅咋。佔領鬧劇死唔斷氣，加上反對派喺議會大搞不合作運動，唔係拉布就係流會，搞到施政癱瘓，莫講話全民退保，低收入在職家庭津貼、公務員薪酬調整等撥款，一樣排住隊等過關嘅咋。
所以話，政府涼薄，政客無良，真係一啲冇講錯，旨意佢哋為市民做實事喎，蚊都瞓蛇都死喇。特別係嗰班搞搞震嘅反對派議員，之前大聲疾呼要求當局盡快推行全民退保，今日就好似冇咗件事咁，你話係咪精神分裂吖。
正所謂，見微知著，全民退保決而不行，遙遙無期，只係整個社會泛政治化嘅縮影。有點樣嘅選民，就有點樣嘅政客，佢哋之所以一味做騷，咪就係因為有觀眾有市場囉，今日香港光怪陸離，就係咁不可思議嘅喇。
點講都好喇，政治唔可以當飯食，唔通日日爭拗，日日上街，退休後就可以安枕無憂咩。當然，如果閣下係職業街頭鬥士，咁又另計啦！