今時今日，基建延誤超支已經唔係新聞，冇延誤冇超支先係新聞。嗱，話口未完，國家級基建港珠澳大橋香港段又宣告延誤超支喇。點解搞成咁？咪又係港府無能，官僚混帳囉。
自從高鐵爆出嚴重延誤兼超支醜聞後，港珠澳大橋重蹈覆轍嘅傳聞就甚囂塵上，結果真係好嘅唔靈醜嘅靈。運輸及房屋局局長張炳良係咁講嘅，大橋港方口岸原本核准預算費為三百零四億元，但由於工資、建材及機械等價格不斷上升，家陣估算起碼要提高五十億元喎。雖然路政署之前好口響咁話，仍以二○一六年通車為目標，不過張炳良就唔敢咁老定嘞，對通車日期一味耍太極，不置可否。
張局長一向係擠牙膏嘅高手，今次故技重施，講啲唔講啲，一啲唔出奇。事實係，大橋香港段北面連接路要推遲至一八年先至通車，仲有唔少工程尚未招標添，拖拉成咁，工程點可能如期完工吖。市民眼睛係雪亮嘅，正如「東方報業民意調查」顯示，四成九受訪者批評港府監管不力，失誤連連；兩成三直指工程費淪為無底洞；一成七更指未能如期通車無助推動經濟，削弱競爭力，可謂一語中的。
係人都知，港珠澳大橋早喺三十年前開始醞釀，拖到○七年先列入十大基建，點知工程依然一波多折。○九年遭入稟司法覆核，令工程延誤逾年，開支增加六十五億元。大橋施工後又挫折重重，一時話地質結構複雜，一時話改變施工方式，搞到進度一再受阻。最大鑊嘅係，澳門及珠海工程進展順利，有望如期通車，一旦香港未能「合龍」，港珠澳大橋淪為「半橋」奇觀，咁就笑大人個口嘞。
咁仲唔止，反對派喺立法會大搞不合作運動，又拉布又流會，追加撥款肯定阻力重重，搞多兩搞，容乜易超支高處未算高，通車遙遙無期呀。上述民調又顯示，四成五受訪者批評工程一拖再拖，成本不斷增加；兩成四擔心工程無以為繼；另兩成四恐爛尾收場，簡直冇眼睇。
講起就唏噓嘞，以前港府以高效率見稱，基建話起就起，邊似得家陣咁甩甩漏漏吖。香港回歸短短十七年，施政完全走晒樣，辦事效率連澳門、珠海都不如，簡直唔知醜字點寫。正如大部分受訪者話齋，弱勢政府無法推動施政，基建淪為大白象，香港出現結構性財赤又有乜出奇。
咁講啦，前朝貪曾政府好大喜功，眼高手低，基建拖拖拉拉，固然衰到冇朋友，但現屆政府無力撥亂反正，一味賴晒前朝亦唔係辦法。點都好，唔該港產官僚醒醒定定，睇緊工程進度，咪老奉攤大手板要納稅人填氹吖！