黃蜂尾後針，最毒淫魔心。佔領行動搞到香港七國咁亂，天怒人怨，人稱「淫賤黎」嘅壹淫媒主席黎智英唔止赤膊上陣，仲不斷煽風點火，將學生當炮灰，叫人去送死，用心歹毒，又點止黃蜂尾後針咁簡單吖。
呢，睇見佔領鬧劇民意盡失，無以為繼，淫賤黎唔甘心失敗，除咗繼續喺「私家皇座」扮指揮發號施令，而且周圍流竄指手畫腳，最陰毒嘅一招就係叫學生去送死。佢早前力促學聯趁亞太經合組織會議期間上京「博拉」，藉此催谷五十萬人上街，學生唔聽佢支笛，決定押後上京，要求全國政協副主席董建華協助安排與中央官員會面。點知淫賤黎竟然發爛渣，聲稱唔知學聯點諗喎，仲話「既然係衝擊，最大衝擊係最好囉，等APEC進行嘅時候，甚至奧巴馬喺度嘅時候最好囉」。
唔怪得有立法會議員鬧淫賤黎「喪心病狂，非常黑心」，佢一味叫學生做炮灰，自己就匿喺後面等睇戲，唔係喪心病狂又係乜吖？只要頭腦稍為正常嘅人都知道，學聯嘅要求根本冇可能實現，講得好聽啲叫理想及激情，講得難聽啲根本係幼稚及狂妄，淫賤黎利用學生思想單純，將佢哋當政治工具，點止係誤人子弟，簡直係毀人子弟。正如有人質疑，既然淫賤黎講到自己咁偉大，點解唔帶頭上京博拉呢？點解唔親自喺奧巴馬面前衝擊呢？
其實，淫賤黎唔止冇勇氣上京博拉，而且隨時準備走佬添。有網民踢爆佢早就將大部分資產轉移海外，喺香港租屋住，連「根」都冇，反而喺英國、法國同日本等地擁有物業，即係話佢隨時準備逃之夭夭，託庇於洋人。講到呢度，大家應該知道點解淫賤黎唯恐天下不亂，佢勾結外部勢力將香港搞亂搞死，自己完全冇損失，受害嘅只係香港人咋。所以話，港之將亡，必生妖孽，呢種咁陰毒嘅妖孽唔剷除，香港人又點會有好日子過吖。
好彩群眾眼睛係雪亮嘅，隨着市民漸漸睇清淫賤黎禍港殃民嘅真面目，佢已經淪為過街老鼠，人人喊打。日前有人喺銅鑼灣波斯富街對開告士打道行人天橋懸掛橫額，指摘淫賤黎係「賣國賊」、「禽獸不如」、「賣港求榮」；有團體就質疑淫賤黎動用龐大資金資助佔領行動，唔少款項來歷不明，要求警方調查並盡早拘捕佢。嗱，呢啲咪就係多數市民嘅心聲囉。
始終都係呢句，打蛇打七寸，擒賊先擒王。要化解佔領亂局，令香港重回正軌，令社會恢復秩序，令市民過正常生活，當局就要清除禍根，將幕後黑手一網打盡！