渡海濠情:浪漫情人 首選龍哥

好多囡囡都投訴男朋友唔夠浪漫,搞到愛情生活冇喱味道,嚟自金池桑拿嘅穆容就係其中一個,今日就搵嚟玄學家分析吓乜嘢生肖嘅男士最浪漫,據師傅講浪漫嘅男士真係好少,數埋只有三個生肖咁大把!

第一位:龍男 喜歡主導

據師傅講屬龍嘅男士,天生就喜歡控制大局,如果知道自己女朋友喜歡浪漫,佢哋就會不斷製造浪漫,令女朋友冧死為止,而且女朋友喜歡變化,佢哋仲會不斷變化,徹底滿足女友嘅需要,但女朋友一定要講明白畀佢哋知,否則懶得就懶,唔搞都有可能。穆容話:「我有個契哥就係屬龍嘅,契嫂話佢哋親熱時一啲氣氛都冇,忍咗幾年卒之忍唔住話佢唔夠浪漫,自此每次親熱前都會特意製造浪漫,我契嫂不知幾咁開心,而且花樣百出,驚喜不斷添!」

第二位:蛇男 天生浪漫

要數十二生肖中真係懂得浪漫嘅人,應該一定係屬蛇嘅男士,因為佢哋天生就喜歡浪漫,而且技巧多多,好多時女朋友冇投訴不特止,有時仲會嫌過多添,特別係老夫老妻仲太浪漫嘅話,唔係咁多人接受得到。穆容話:「我以前有個老闆就係屬蛇嘅,佢對太太不知幾好,幾十歲出街仲會送花,但佢老婆就成日鬧鬼佢,於是佢將滿腔浪漫情懷,用喺其他小三小四身上,嗰啲妹妹仔不知幾冧,但好在佢仍然好愛佢老婆,咁至冇因為浪漫而家變!」

第三位:猴男 生性愛玩

師傅話再數落去就係屬猴嘅男士,佢哋都會偶爾浪漫一下令女朋友驚喜萬分,但佢哋嘅出發點就係要玩,並唔係存心滿足另一半,所以當中三分真情七分假意,如果唔計較嘅,都會十分受用,相比其他生肖朋友,已經好好多。穆容話:「我以前嘅男朋友就係屬猴,佢真係周不時都有驚喜畀到我,但都係佢開心多過我開心,唔係先整蠱我後再送上小禮物,就係約埋大班人嚟畀驚喜我,即時感覺都唔錯,但後嚟就發現,主角係佢唔係我,認真心淡!」

本周大吉生肖

異性運:虎、羊、猴

桃花運:狗、牛、龍

和合運:鼠、兔、馬

穆容Profile  

年齡:20歲

三圍:33-23-34

撰文:小德

攝影:阿生

玄學提供:寶源師傅