政情：港鐵站演奏 姚珏與民同「樂」
聽古典音樂，唔一定要去音樂廳，著名小提琴家姚珏尋日傍晚六點放工時段，喺港鐵香港站舉行四十五分鐘街頭音樂會，即場演奏扣人心弦嘅精華版《梁祝》。姚珏薄施脂粉，穿起貼身長裙，有別於一般街頭音樂家嘅粗豪形象，優雅風姿吸引逾百市民圍觀。
受馬友友啟發
喺熙來攘往嘅港鐵站表演，姚珏話係受國際大提琴家馬友友啟發，因為對方去年聖誕節喺芝加哥商場演出，令佢覺得音樂應該「走出去」，為市民服務。同觀眾近距離接觸，姚珏心情激動，佢專登帶埋十多位弟子同台演奏，磨練吓佢哋嘅演奏功力。佢話，港鐵站人聲鼎沸，唔似音樂廳咁靜，演出時要更集中、更靈活，久而久之，對音樂家係一個非常好嘅鍛煉。