政情：公民講場：德成派傳單坐監 「犧牲」大過罷課

大專學界近日就政改發起罷課，但被行政會議成員李國章揶揄罷課對件事無作用，如果係願意犧牲，就應該退埋學咁話。尋日民政事務局局長曾德成出發去韓國仁川時，被問及對學生罷課嘅意見，佢就自爆有記者一再追問佢對罷課意見，記者仲話佢最有資格去講呢個問題添，但佢話自己從來冇罷過課喎。咁又係，德成局長當年只係喺學校派吓反港英政府嘅傳單就被拘捕，最後仲要坐埋監添，真係夠晒「犧牲」，可能學生罷課要罷到坐監，先至可以搵佢回應喇！