政情：大劉違交通例 羅傑承被問候喪喊
捲入澳門巨貪案而被澳門初級法院判囚嘅華人置業主席劉鑾雄（大劉）及南華足球隊足主羅傑承，尋日不約而同出咗醜。大劉喺灣仔食完午飯後，坐車返寫字樓時遇上交通擠塞，佢竟然索性落車，喺車陣之中穿梭行返公司，公然違反交通條例。傍晚就輪到羅傑承喺球場上喊到冇晒儀態。
劉着長袖褸 烈日乾蒸
先講大劉，尋日中午十二點幾，大劉一如往日去到灣仔富豪飯堂福臨門用餐，大熱天時，佢竟然着住長袖灰色風褸同白色長褲，期間對記者嘅提問十問九唔應，黑口黑面咁行入飯堂食飯。十分鐘之後，大劉嘅大女劉秀融嚟到，佢哋食足兩個鐘先至走人。
大劉同囡囡一齊坐車返華置辦公室時，大約喺距離寫字樓唔夠一百米路段塞車，因為路面發生交通意外，兩人坐喺架車入面發呆。過咗五分鐘，大劉可能等得唔耐煩，竟然選擇落車行返公司。
當時氣溫有成三十幾度，就算着住長袖風褸嘅大劉唔怕熱，又公然挑戰香港交通條例，但都唔好連累佢位秘書小姐，要陪住老細違例喺車陣中穿梭喇！
羅正式離任南華足主
至於早前宣布辭去南華足主嘅羅傑承，尋晚喺球場睇完南華今季最後一場賽事後，亦將正式離任。期間有球迷送上問候，佢竟然喊起上嚟，仲話如果時機啱嘅話，佢一定會返嚟，除非南華唔畀佢搞喎！以羅傑承戴罪之身，佢想搞，人哋就畀你搞咩？