立法會預算案拉布戰進入尾聲，立法會主席曾鈺成尋日特別叮囑啲議員，唔好成日行出行入，否則一唔夠法定人數開會，又要響鐘等人，浪費晒啲時間。多名建制派議員不滿有關言論，其中曾鈺成嘅黨友陳恒鑌就投訴，即使佢哋冇全程坐定定喺度投票，都總好過嗰班直頭連會都唔開嘅泛民議員，質疑主席點解唔鬧吓班泛民？曾鈺成坦言佢冇權強制任何議員返嚟開會，曾經唔認得商務及經濟發展局副局長梁敬國嘅佢，又懶幽默話，嗰啲好少返嚟開會嘅議員，就算依家返到嚟，佢都可能唔再認得佢哋嘞！
