北角多爛地 坑害行人
行人路面凹凸不平頓成陷阱，路政署被指疏於巡查「跣行人」！北角人口稠密，加上近年內地旅行團湧入致擠迫情況更甚，途人熙來攘往加劇行人路面耗損，令區內多處路面皆有凹陷情況，有市民早前便因此絆倒受傷。區議員指區內人口老化，長者跌倒後果尤為嚴重，批評路政署接獲投訴始作跟進的做法過於被動，促加強巡查及維修。
「個渠蓋邊有個凹位，嗰日戟一戟就向前仆，跌咗喺地下，隔咗一陣先至坐得番起身。」徐太指當日行經北角道時被絆倒，需到東區醫院急症室求診，「隻手擦損咗，要打破傷風針同覆診洗傷口，條腰都痛咗一排，個膝頭就腫到好似網球咁！」徐太憶及受傷情況時仍猶有餘悸。
致電1823竟無回覆
徐太又指，北角道連接英皇道與電氣道，為不少居民必經之路，加上北角區人口老化，擔心一旦有長者絆倒，後果將不堪設想，「嗰晚已經即刻打去1823同路政署講，點知隔咗幾日都冇覆，又冇話幾時整番條路，隨時又再有人跌親，點解路政署咁慢？」徐太不滿路政署跟進有欠積極，未有保障公眾安全，「唔好以為跌親好小事，好多老人家都唔跌得，我老爺就係因為跌一跌就走咗。」
記者曾作實地視察，發現路政署已利用雪糕筒圍封涉事地點，但附近仍有不少行人路面同樣有凹凸不平的情況，包括糖水道電車總站對出的行人路，高、低位便相差逾一吋半，而渣華道亦有雨水渠高出路面接近一吋。
路政署發言人證實，曾接獲投訴指北角道行人路路面損毀，派員實地視察後發現有損毀情況，已隨即安排維修，工程亦已告完成。發言人強調，該署負責保養轄下公共道路和附屬道路設施，如發現破損將作適時維修，亦有派員每月定期巡查涉事地點，以保障行人安全。
效率促進組發言人表示，1823曾接獲市民投訴上述路面不平，當晚已致電投訴人確認位置後，隨即轉介路政署跟進。
區議員促署方巡查
「北角區本身人口多，呢幾年又多咗好多內地旅客嚟購物，加大咗行人路面耗損，已經有好多人同我反映話路面唔平扭親！」一直跟進有關問題的東區區議員許清安指出，北角多處行人路路面質素欠佳，惟一直鮮見路政署巡查，「除非有市民投訴，唔係嘅話都好少主動做嘢，區裏面咁多老人家，如果出事就真係可大可小！」許要求路政署應加強巡查及盡快維修損毀地方。
記者：呂耀焜