政情：今日你上鏡：方便「履」投票
雖然立法會拉布戰進入尾聲，但唔少議員仍出動新法寶抗拉布。平日官仔骨骨嘅工業界議員林大輝就專登買咗對懶佬鞋，貪唔使綁鞋帶，方便跑上跑落「鐘」。據講對鞋索價幾千蚊，可惜拉布戰就嚟結束，對鞋或者留待下次拉布再着啦！
而飲食界議員張宇人（Tommy）亦有舒適裝束，佢暫時將西裝、皮鞋放埋一邊，換上一身便服及網球鞋現身立法會，佢透露對網球鞋只係幾十蚊，同大輝嗰對相比，又平又舒服喎！但細心一望，佢對鞋係瑞典貨，原來Tommy講緊係幾十蚊歐元。咁又係，Tommy又點會畀自己着平嘢呢？