- on.cc 東方互動主頁
- 4月3日 (四)
鄉議局主席劉皇發（發叔）自上月接受報章訪問提到佢哋討論過組黨一事，副主席林偉強之後就多次講到組黨幾咁「迫切」。不過，發叔日前再被問到係咪組黨時，又話自己冇講過組黨，只係構思整合鄉議局為參選部署喎，咁究竟係咪組黨o架？林偉強尋日上電台節目話，組黨工作進度正常，只係發叔一向穩重，所以講得小心啲喎。又組黨又唔組黨，莫非擔心激嬲西環，所以同發叔扯貓尾？
林偉強解釋，根據《鄉議局條例》第一○九七章規限，鄉議局係唔可以組黨嘅，所以唔會用鄉議局個名去做，但相信鄉事派會組黨，而未來嘅黨員都一定會係鄉議局成員喎。明晒，唔怪得發叔話冇講過鄉議局要組黨啦，其實係鄉事派組黨，其他建制派就要小心被搶票喇！
有節目參加者問到，點解鄉議局唔加盟其他大政黨呢？林偉強話，結盟等於寄人籬下，做事冇咁直接，仲坦言「萬事起頭難」，任何政黨都係由零開始，但係無論選舉結果係點，都嘗試以政黨名義參選一五年區議會選舉，總之周五舉行嘅集思會就會傾，而組黨係事在必行咁話。究竟鄉事局係咪真係組得成黨，講多都嘥氣，等有個黨出嚟先至算啦！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
