政情：CY坐直升機視察大嶼山
最新一份施政報告建議發展大嶼山及建立東大嶼山都會，雖然正反聲音激烈，發展去向未明，但原來特首梁振英（CY）早幾日已秘密約咗發展局局長陳茂波一齊坐直升機，到大嶼山上空視察發展該區嘅可行性，似乎CY相當重視發展大嶼山喎！
邀各界禮賓府團拜
雖然農曆新年已經過咗，但CY尋日依然邀請近百位來自唔同界別嘅嘉賓，到禮賓府參加新春團拜，一齊飲啖茶、食個包，飲碗杏汁豬肺湯補一補個肺，兼互相交流吓意見。好多嘉賓都畀面出席，好似扶貧委員會社會參與專責小組副主席紀文鳳、中央政策組全職顧問高靜芝，連藝人黃秋生都係座上客。
有份出席嘅離島區議員周浩鼎（Holden）當然唔放過機會啦，向CY追問發展大嶼山嘅進度，聽見CY已經坐埋直升機視察大嶼山，相信Holden唔使擔心政府嘅研究進度喇。話時話，之前有人提過大嶼山郊野公園土地可以發展，唔知CY視察完有冇新發現呢？