政情：「分道揚鑣」當分工 吳得掂認衰
外號「吳得掂」嘅教育局局長吳克儉前日視察開學日期間，話要同副局長楊潤雄「分道揚鑣」，唔知嘅以為佢哋是但一個劈炮唔撈，知佢講錯嘢嘅就掩住半邊嘴笑。
馬後炮話想講兵分兩路
吳得掂尋日晏晝出席一個午宴時，就借機會認衰，原來佢係想話同楊潤雄「兵分兩路」去視察唔同學校，只係口快快講錯咗，話下次會慎言，諗定啲四字詞語，又話大家都知佢講緊乜喎。
究竟吳得掂個心係咪想同楊潤雄「分道揚鑣」就唔知喇，但自從去年國教科風波之後，就同新聞秘書李黎式暉（Mary）「分道揚鑣」，搵咗張志明（Roger）頂替。新聞團隊前日就主動幫佢補鑊，話「分道揚鑣」同「分工」意思差唔多，所以將「分道揚鑣」刪去。新聞官咁醒目，難怪吳得掂似乎都幾滿意新團隊，話同事之間經驗多咗、溝通多咗、摸得熟落咗、默契多咗，落實政策都順暢啲喎。