中環出更：泰迪羅賓 分享音樂人生路

Teddy話，佢自細鍾意踢波，踢完波後經常走去涼茶舖飲嘢、聽歌，慢慢就培養咗對音樂嘅興趣，並且開始玩結他、夾Band。音樂帶領Teddy進入另一個世界，佢經常去學校及公開場合表演，終於有日被星探發掘入娛樂圈，從而走紅歌壇。

當佢歌唱事業發展如日方中時，毅然決定出國流浪，到大大小小嘅鄉鎮生活，呢段時間佢經常睇唔同嘅電影，從中掌握做導演嘅竅門。不過，佢笑稱自己冇攞獎運，咁多年嚟都係為他人作嫁衣裳，直至最近先至憑《打擂台》攞到香港電影金像獎嘅最佳男配角。

梁卓偉鋼琴室溫書

同場嘅食物及衞生局副局長梁卓偉，佢嘅音樂人生同Teddy好唔同。受到媽媽係音樂老師嘅影響，梁卓偉四歲就開始學鋼琴、接觸古典音樂，雖然佢最後選讀醫科，但音樂令佢一生受用無窮。

梁卓偉自爆讀大學期間，從來唔揀醫學院嘅溫習室溫書，反而走去音樂系嘅鋼琴室，貪嗰度可以每一、兩個鐘就彈琴放鬆吓。依家佢身在官場，但仍擔任香港兒童交響樂團客席指揮，每周都要練習，卻樂此不疲。