政情：自爆婚外情 堅想洗底？

尹兆堅憶述，大約五年幾前，即係○八年立法會選舉前夕，當時佢剛剛脫離街工，又未加入白鴿黨，當時佢同太太成日鬧交，彼此感情好差，差到去鬧離婚嘅地步。點知呢個時候，佢就認識一個二十幾歲嘅女仔，結果兩人開始咗一段半年嘅關係。佢話，當時已經無晒理性，完全唔醒覺做錯咗，同第三者出街食飯睇戲仲試過被朋友撞破添。直至半年後，佢醒覺唔可以繼續落去，決定揮刀斬情根，唔再同嗰個女仔聯絡。

感情缺失 退出上屆「超選」

佢老婆知道後當然好嬲啦，尹兆堅話足足用幾個月時間，老婆先肯原諒佢。本來呢件事唔想公開，但自從去年有意參選立法會後，無論黨內、外都有人傳佢有婚外情，好多人仲加鹽加醋，話親眼目睹佢同個女仔去「開房」，所以突然退選超級區議會，唔多唔少都同呢單嘢有關。原本以為退選就可令事件告一段落，點知最近佢報名參加黨內「種子計劃」後，又有人重提舊事，仲聽聞有人掌握佢嘅黑材料，叫佢小心啲。

稱再唔公開 家人傷害更深

尹兆堅覺得婚外情的確係錯，唔應該逃避，又話如果呢個炸彈五年後、十年後至引爆，咁樣對老婆、一對仔女會傷害更深，所以同老婆商量後決定公開婚外情一事。佢仲話，尋日臨出門口前，老婆仲錫咗佢一啖以示鼓勵，但就令佢十分內疚，因為搞到要由老婆幫手分擔，嗰刻講起連眼淚都流埋。至於女主角係邊個，尹兆堅就話對方只係半個圈內人，唔應該拖人落水，一切責任應由佢承擔，唔想女事主再受任何傷害。

政治永遠都係觀感大於一切，尹兆堅自爆有感情缺失，係咪能夠獲得選民原諒實在好難講，睇嚟佢都係想博一鋪，成功洗底就可以再戰立法會，否則分分鐘連任區議員都成問題。