政情：公民講場：刑檢一哥卸任前 貪曾落鑊？

「貪曾」前特首曾蔭權爵士嘅貪腐案，廉政公署調查足足十八個月仲未有聲氣，相反其他較遲發生嘅案件反而「遲來先上岸」，令人質疑廉署係咪對貪曾放軟手腳，等案件不了了之。不過，即將卸任嘅律政司刑事檢控專員薛偉成尋日就爆料，透露貪曾案調查複雜，涉及境外調查，但預計案件已接近完成。薛偉成咁講，係咪意味廉署會喺佢下月八號卸任前會向律政司提交貪曾案嘅調查報告呢？如果係嘅話，兼且若有足夠證據證明貪曾以權謀私，律政司就可以正式將貪曾「落鑊」，睇怕貪曾未來十四日將會有得震，冇得瞓。