政情：「遍地開花」抗佔中
民陣今年七一遊行疑係「佔領中環」嘅預演，並將遊行終點由金鐘添馬艦政府總部改到中環遮打道行人專用區，建制派睇準呢個千載難逢嘅時機，全面發動守護金鐘添馬艦行動，七一當日頭炮計劃喺添馬公園舉行嘉年華，又會喺全港多區舉行形形色色嘅嘉年華活動，用意係要「遍地開花」，營造和諧氣氛抗衡「佔中」預演，究竟有份搞七一活動嘅大旗手、工聯會榮譽會長鄭耀棠（棠哥）最後會使出乜嘢撒手鐧呢？
象徵意義大於一切
七一遊行係泛民主派嘅指定動作，建制派每年都絞盡腦汁抗衡亦非新鮮事，但今年最特別之處係兵分兩路同泛民爭一日之長短，其中首條戰線就係本報尋日講過「少林寺十八銅人」，即係十八個區議會都要動議反對「佔中」，而另一戰線就係七一遍地開花嘅和諧氣氛。
消息指，建制派今年有意一反過往集中資源喺大球場搞大型匯演嘅做法，分散投資喺全港多區舉行嘉年華活動。就以觀塘區為例，據聞依家會喺七一當日，分別喺油塘、秀茂坪同牛頭角舉行三場與眾同樂嘅活動。至於作為政治經濟核心嘅中西區，更有意趁住民陣放棄以金鐘政府總部為遊行終點，破天荒喺添馬公園搞嘉年華。有知情人士形容，喺添馬公園搞嘉年華係象徵意義大過一切，似乎有啲向「佔中」預演示威嘅味道。
除咗數之不盡嘅嘉年華外，據聞有團體亦有意向有需要人士派發福袋，另有工商界更積極籌備喺七一前後搞商戶優惠日，例如畀貧苦家庭以優惠價購買書籍文具，長者亦可以優惠價添置日用品等，希望可以媲美早年商戶因經濟不景氣派發優惠券等舉措。
棠哥多計 七一出招
同樣不能忽略嘅係棠哥正密鑼緊鼓籌備緊嘅七一活動，事關棠哥出名諗頭多多，好似近年高難度嘅花式跳傘等表現都極具吸引力，如果一旦又發掘到有乜新奇刺激嘅活動獻畀港人，到時又會搶晒大家眼球，建制派連串招數講到尾都係營造社區和諧氣氛，睇嚟「佔中」預演到時都未必搞得起。