政情：樹根畀料警方遏罪行
「雙料議員」鍾樹根（樹根）喺地區打滾多年，好多疑難雜症都難唔倒佢，最近佢再次立功，向警方提供罪案消息後，成功協助警方搗破角子老虎機賭檔，邊個話區議員「升呢」做咗立法會議員後會忽略地區民生議題？
破角子老虎機賭檔
樹根尋日喺社交網站貼上一封警方來函，對於佢喺去年十二月提供罪案消息，港島總區刑事總部經調查後，於今年三月底搜查港島某遊戲機中心，拘捕九名男女，並檢獲多台相關角子老虎機，警方現正就案件徵詢律政司法律意見，又感謝佢提供消息遏止罪行。據聞呢個遊戲機中心位於銅鑼灣，早前有人曾向警方舉報，但一直未有回音，反而樹根介入跟進後就有新進展。
樹根接受我哋查詢時，起初講笑話可能係警方見到佢個名，畀面佢所以快啲跟進喎！不過，之後佢先至一本正經話係有市民向佢報料，然後轉介畀警方跟進，所以其實佢無正式到警方畀口供。至於會否希望獲得良好市民獎嘉許呢？樹根自言唔係好恨要，反指最緊要係幫到市民。