政情：教師團訪滬撞正疫情 葉Sir逼食足7日牛

「上館子」謝絕「掃街」

葉Sir上星期同一班小學老師一行十一人參加咗香港教育學院搞嘅上海交流團，同當地嘅小學交流，既然出發後先知當地爆發H7N9禽流感，去到自然非常小心，一於唔食豬肉、唔食雞肉、高危嘅禽鳥更加掂都唔掂，仲連大家出門旅行好鍾意嘅「掃街」都唔敢去，謝絕街邊小食同生冷食物。

葉Sir仲話，因為擔心當地嘅食物衞生，佢哋咁多日都淨係「上館子」，去啲望落企理嘅餐廳，同埋淨係食牛肉同蔬菜，最多都係叫啲煮熟咗嘅海鮮。咁樣食足七日，難怪葉Sir話自己食牛食到厭喇。