政情：厚顏李漢奸 跪低藏禍心
外號「李漢奸」嘅民主黨創黨主席李柱銘，日前無啦啦提出二○一七年特首普選「跪低」方案，結果被泛民盟友圍剿，迫使佢極速「跪多次」認衰撤回方案，並須自認鹵莽兼冇深思熟慮。李漢奸尋日接受電台節目時，繼續為自己提出嘅短命方案死撐，一時話當日接受傳媒訪問時休息不足、缺乏警覺，一時又話自己「心靈疲倦」，要向現實低頭，因此想「攝」咗隻腳入門隙先，以便有機會打開道普選大門喎，完全係跌咗落地拿番揸沙！
想「攝咗隻腳入去先」
李漢奸尋日直認提出跪低方案，係為咗幫泛民入閘選特首嘅一己私利：「點解我會向現實低頭呢？可能係我心靈疲倦咗，爭咗咁耐，依家仲喺個框框裏面，我嗰時諗咩？就係攝咗隻腳入去先嘛！攝咗隻腳入道門（隙），都有機會整開道（普選）門，呢個係功利行先，現實行先！」不過奇就奇在，如果佢份人真係諗得咁現實，點解幾年前佢又狠批自己一手創立嘅白鴿黨進入中聯辦談判同支持政改方案呢？
大家睇真啲呢幾日嘅事態發展，就會發現李漢奸提出「跪低」方案，絕非一時「心靈疲倦」咁簡單，好可能又係涉及惡名昭著嘅「搞事四人幫」嘅驚天大陰謀。我哋尋日向大家直擊，李漢奸前日晨早現身中環的陸羽茶室密會壹傳媒肥佬黎，歎茶後乘坐肥佬黎座駕返屋企，當日下午就開記者招待會宣布收回方案，真係夾都冇咁啱。
正當疑團未解之際，我哋尋日朝早見肥佬黎如常去陸羽茶室歎早茶，離開時表現得鬼鬼祟祟，左望右望，好似做咗虧心事咁，之後就返回將軍澳爛蘋果總壇。到傍晚約六點半鐘，肥佬黎又搵專車去接載「搞事四人幫」另一成員、天主教香港教區前主教陳日君樞機到其加多利山寓所。到六點五十分，李漢奸再乘坐一輛落晒簾嘅七人車進入肥佬黎寓所，好似唔見得光咁。
到晚上九時許，我哋再見到陳日君同李漢奸等先後坐車離開，李漢奸座駕後座見到一個熟口熟面嘅女人，原來佢係前廣播處長張敏儀。須知張敏儀係「民主阿婆」前政務司司長陳方安生嘅密友，如果佢真係代表陳太嚟出席密會，「搞事四人幫」就真正齊晒腳！究竟四人喺呢個政改敏感時刻密會所為何事呢？相信香港市民都好想知道。