中華廠商聯合會代表林大輝最近言論出位，先有雙手合十「林大師」上身，怒斥特首梁振英（CY）被揭僭建係「因果循環，報應不爽」，前日更喺泛民主派提出嘅特首不信任動議中投贊成票。事隔不足廿四小時，大輝唔知係咪知衰，突然發信畀廠商會同人補鑊，解釋投票支持不信任動議嘅原委，當然大輝解釋還解釋，廠商會中人係咪收貨就係另一回事喇。
還記得大輝日前狠批CY時，成功贏得唔少反CY人士嘅掌聲，但事後佢嘅幕後「老闆」廠商會高調發稿力撐CY，變相狠狠摑大輝一巴。
未知大輝係咪經一事、長一智，今次先發制人，喺支持特首不信任動議後主動發信畀廠商會同人，形容投贊成票目的當然唔係要特首下台，只係希望CY視呢個動議係警惕，揚言「完全係出於真心為香港好」喎，企圖為自己今次投票補鑊。
據聞大輝今次明目張膽再反CY，喺廠商會內部造成好大回響，有人認為大輝疑似挾持廠商會個名搞個人恩怨，之後點「補鑊」都只係遲來嘅春天，一陣影響廠商會同政府嘅關係，損失就大喇。話時話，人最緊要係飲水思源，大輝再係我行我素嘅話，相信只會陷廠商會於不義，對雙方繼續合作又有乜益處呢？