政情：王敏剛響朵照被趕
香港友好協進會尋日喺信和集團旗下嘅灣仔中環廣場舉行一場座談會，畀競逐今屆港區全國人大代表嘅候選人向選舉委員會委員講述政綱同理念，由於座談會屬閉門會議，記者只好喺會場地下大堂等候一眾出席嘅候選人。不過，當保安員見到記者同競逐連任港區人大代表嘅王敏剛傾談時，就先後多次驅趕，當時王敏剛就響朵話：「我係信和董事喎！」但保安員照樣驅趕，搞到佢好冇面，臉都黑晒。
當堂谷住道氣
當保安員趕咗幾次之後，無可奈何下竟然建議王敏剛同記者企埋牆邊，一邊扮睇花，一邊傾談，認真搞笑，當然王敏剛就顯得好谷氣啦！我哋翻查資料，查實王敏剛係信和酒店（集團）嘅獨立非執行董事，應該係負責酒店及遊艇會業務範疇，可能中環廣場唔係酒店，所以保安員就分清楚要驅趕佢？定係該集團有規矩唔畀人喺大堂扑咪呢？又抑或係王敏剛唔夠面子呢？不過，如果信置主席黃志祥喺大堂同記者傾偈，相信唔會被保安員驅趕啦。