政情：甩毛白鴿 吹雞丟架
民主黨（白鴿黨）前日搶閘，搞單「聖誕快落台」倒梁遊行係威係勢，出動埋該黨新成立嘅創意媒體部搞文宣，企圖藉機抽水，攞番個彩，之但係遊行篤到盡都係得八百人參與，連原先預計嘅一千人都冇。有網民恥笑白鴿黨做咗廿幾年民主「生意」，吹晒雞都動員唔到百分之一嘅支持者出嚟撐場，根本係曲線示弱挺梁咁話！
白鴿黨自從喺立法會選舉失利後，眼見社民連同人力等泛民分裂出嚟嘅激進派，雖然窮到褲穿窿，既冇蛇齋餅糉，亦冇肥佬黎捐款過千萬關照，但號召力依然驚人，好多仲「升呢」做議員，一眾老鴿決定動起來，可惜效果差強人意。
好似星期日嘅倒梁遊行，班老鴿分明係見民陣率先宣布元旦日搞，為咗攞彩，就嗱嗱聲入紙申請搶先舉行遊行，結果梗係有目共睹，佢哋公布話有八百人遊行，警方就話只有三百，最後連網民都譏笑班白鴿搞場咁嘅大龍鳳，自己友都唔call齊出席，要好好檢討，仲揶揄佢哋橫掂都係咯，應該call多啲公公婆婆出嚟，點都砌夠佢一千人。除咗遊行，白鴿黨連聽日搶先對特首梁振英（CY）提嘅不信任動議，一樣係見獨立謝偉俊（Paul）提出，先又嗱嗱聲霸位打尖動議。
單仲偕做主席被睇死
白鴿黨自從支持咗政改方案後，兩面不是人直至依家，既然願意達成協議得唔到市民欣賞，於是被迫搞激啲。不過今年九月白鴿黨立法會選舉失利，主席何俊仁辭職謝罪，立法會新人又接唔上，舊將單仲偕（(先刂)雞）即將被抬上主席之位，不過以(先刂)雞嘅風格，又點會激得起？白鴿兩面不是人以至搞遊行都唔夠一千人，睇嚟仲要捱落去，唔知要遇到一個乜嘢契機，至可以打破困局。
梁振英嘅僭建風暴令嚟緊嘅元旦熱鬧起嚟，人力同網民發動市民元旦遊行去禮賓府，仲話要過夜添，又話號召到三、四萬人就可以包圍禮賓府。政團鬥到上街，可以發動幾多人，都竟然係一個「競賽」嘅項目。