中環出更：陳裕光出年做外公又做爺爺
人逢喜事精神爽，卓妮近日每逢見到大家樂集團主席陳裕光（Michael）兩夫婦，佢哋都笑到蓮子蓉咁嘅面口，梗係啦，愛女陳浩寧（Candice）身懷六甲，就快有外孫抱，諗起都興奮，原來囝囝陳浩弘同太太Jaclyn都造人成功，新抱已懷孕三個月，即係話，Michael做完公公後接住又做爺爺，真係好事成雙，恭喜晒！
Michael太太羅寶靈話，浩弘比Candice早半年結婚，估唔到妹妹爬咗阿嫂Jaclyn頭先懷孕，更估唔到Candice佗B冇耐，Jaclyn又發現有咗，兩人嘅生B時間咁相近，到時一連增加兩名家族成員，屋企肯定好熱鬧。陳太話，細B只有三個月，暫未知係男定係女。講到佗Ｂ心得，陳太話，有叫Candice同新抱多飲牛奶補鈣兼增強抵抗力，依家兩個都佗得好好。
問吓將榮升公公同爺爺嘅Michael，使唔使分別預留四百萬元「教育基金」畀兩個乖孫？佢就笑笑口咁話：「你估我係李麗珊佢咩！」不過，以陳生豐厚嘅家底，乖孫嘅「基金」斷估又何止四百萬元吖！