政情：胡法光首度膺榮譽博士
本身係港協暨奧委會副會長，以及多個體育總會名譽會長嘅菱電發展名譽主席胡法光，嚟緊十一月將會獲城大頒授榮譽社會科學博士學位，藉以表揚佢對教育同社會嘅貢獻。胡法光本身早就獲頒勳銜無數，但榮譽博士學位都係第一次，可喜可賀。
胡法光曾經做過嘅公職極多，包括立法局議員、全國政協委員、港事顧問等等，但最值得一提嘅，係佢其實做過市區重建局前身、土地發展公司嘅首任主席。除咗胡法光外，有「蘭桂坊之父」稱譽嘅海洋公園主席盛智文，亦獲頒榮譽工商管理學博士，至於中國科學院院長白春禮就獲頒榮譽理學博士。
盛智文做生意叻，管理海洋公園更加叻，去年已經取得特區最高榮譽嘅大紫荊勳章，對社會有幾大貢獻確實唔需要多講。雖然今次已經係佢第二次獲頒榮譽博士學位，但由香港嘅大學頒授就係第一次，相信對於居港四十多年、以香港為家嘅佢一定好開心啫！