政情：西環追call 發叔唔聽「話」

即時飛泰國度假

選舉提名期結束前，先後有已報名嘅參選人退選，包括參選金融服務界嘅詹培忠及醫學界嘅潘德鄰，雖然兩位各有解釋，唔認「被勸退」，但孰真孰假，只有當事人先知。西環勸退人向來唔手軟，就連親建制嘅鄉事派亦唔例外，事關佢哋喺新界西及新界東都派人出選，公然同其他建制派候選人搶票，據聞唔少鄉頭都因此被「照肺」。

新界東直選總共有二十張名單競逐九個議席，當中唔少係建制派鬼打鬼。據聞西環新界工作部最高層，喺本周二選舉提名期最後一日，盡最後努力要求發叔令邱榮光退選。發叔平時好聽話，但今次竟然聽完第一個電話嘅來意後就再冇聽以後嘅電話，仲飛咗去泰國度假添。我哋先後多次嘗試聯絡發叔，但電話一直長響無人聽。

發叔今次派人搶票，據聞係新仇舊恨共冶一爐，除咗被迫放棄行政會議成員一職及新界村屋僭建風波外，有傳仲要佢交出立法會鄉議局功能界別議席。唔單止咁，政府七月授勳時，據講發叔提名嘅名單亦全面被封殺，加上有人事事偏袒「親生仔」民建聯，結果出現咁嘅局面。

老竇發惡仔當災

鄉事派今次企硬，當然唔會冇後果，有傳發叔個仔劉業強，本應明年有機會做全國政協委員，但今次事件後，委任旋即告吹。據聞發叔派人參選只係報復嘅第一波，新界東鄉事派嚟緊仲會成立一個寮屋關注組，致力開拓寮屋居民嘅票源，有鄉事中人講到明，就算贏唔到，都要搵一個半個西環祝福嘅候選人「陪葬」，睇嚟呢場抗爭仲有排玩落去！

參選新界東嘅名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、陳克勤、葛珮帆、梁國雄、龐愛蘭、何民傑、梁安琪、方國珊、龐一鳴、徐家傑、陳國強。