貪曾臥港七年，施政劣迹斑斑，人未走，茶已涼，其實係正常過正常！夕陽政府Hea多一個月就收檔，而下個月十五日立法會搞嘅午宴，就係貪曾出席嘅最後一次，不過六十個議員只得三十三人報名出席，連建制派都無一個黨齊人，「人亡政息」，政治嘅嘢就係咁現實！
以貪曾咁愛「面子」，「最後午宴」咁冷清，未知佢個心有冇好似佢「親兄弟」鬍鬚曾形容樓市「火與冰」嘅感覺呢？講開冰火，老朽唔會一諗就聯想起「邪骨」；呢輪興講文化，老朽想起梁啟超個雅號「飲冰室主人」。
「飲冰室」一詞，典出《莊子‧人間世》。莊子話就話鍾意逍遙遊，之不過以其超逸之思想，絕對唔會接受富豪款待，事關佢靠想像已可上天入海也。回到「飲冰室」呢個詞嘅出處，話說楚莊王的玄孫諸梁為楚大夫，奉命出使齊國，自覺責任重大，特來向孔子請益，他說：「今吾朝受命而夕飲冰，我其內熱與！」楚莊王呢位玄孫心繫百姓，憂心國事，早上接到任命，內心焦慮要如何把事辦好，晚上就要喝冰水解熱，其責任感確令人動容！
一晌貪歡、愛做離岸特首嘅煲呔曾，如出席「最後午宴」，講真，即使與出席的議員杯上杯落，言笑甚歡，佢若有點良知，受「冰火」煎熬，對着滿桌佳餚，恐怕亦食不知味也！
臥港七年，煲呔嘅icon，遠觀近看，都係一個「貪」字。老朽咁有文化，都唔識點安慰佢！