政情：唐唐慘敗 一地眼鏡碎
第四屆特首順利選出，梁振英（CY）以大比數擊敗唐英年及何俊仁當選。還記得當初唐唐被傳出有意參選特首時，民望一直高企，有着坐定粒六之勢，就連部分玄學家、術數師、以至黃大仙靈籤喺年初都預測唐唐會當選，但如今跌到一地都係眼鏡碎。不過，本報年初為CY求得嘅黃大仙中吉籤「孔子聞韶樂」卻露出玄機，意旨CY參選好似孔子為研究韶樂廢寢忘餐，最終大功告成。
特首選舉大局已定，係時候重提舊事。我哋曾經喺今年一月、即係農曆新年前，曾經搵過幾位玄學家同術數師批算一班高官、疑似特首候選人嘅運程。
當時玄學家楊天命批算，唐唐龍年行正印運，其八字最似未來特首，應該好大機會順利當選喎。至於CY就行食神運，但食神會制住官星，旺名氣卻不旺仕途，空有計劃、有抱負卻不能實行，兩年內嘅官運都唔好。
批中桃花小人纏身
香港術數家協會術數師楊子東亦批過，唐唐龍年行大運，合官星，當上特首問題不大。至於CY就表現非凡，春夏天都好運，但無奈同大運唔配合，立秋之後運程略遜。如今選舉結果係點，唔使講都知喇！不過，兩位楊師傅都批中唐唐會遇到不少麻煩同突變，會引起各界關注，要小心有桃花同小人纏身，都叫做啱一半啦。
除佢哋兩位外，我哋亦到過黃大仙祠為唐唐同CY求籤，唐唐支籤係第七十三簽「古人孫霖中狀元」，係一支春風得意、衣錦榮歸嘅上上簽，簽語道盡古人孫霖中狀元嘅喜氣洋洋，而當時解簽佬話籤文意旨唐唐「金榜題名」。不過，唐唐最終「名落孫山」、「鎩羽而歸」。
至於為CY求得嘅係第九十二籤「孔子聞韶樂」中吉籤，籤文道：「至聖周遊列國行、在齊得聽奏韶聲，三月不知嘉肉味，善哉大道可功成」，網上資料顯示，孔子喺齊國聽到韶樂，令佢心神陶醉，於是專心致志去研究韶樂，廢寢忘餐，連食肉都唔知咩味，最終大功告成，暗示CY要經過努力先至成功。不過，都係嗰句，每個人對籤文嘅領悟都唔同，而且信則有，不信則無。