人怕出名豬怕肥，美國ＮＢＡ球星林書豪一登龍門、聲價十倍，大家都對佢趨之若鶩，稱佢為「林瘋」。連力挺唐英年參選特首、幫煲呔曾護短嘅經濟動力立法會議員林健鋒（Jeffrey），都借林書豪嘅事迹曲線挺唐。相信球迷睇完Jeffrey篇文之後，唔識嘅會被佢笑死，識嘅就被佢激死。
Jeffrey喺社交網站facebook大讚林書豪具有永不言敗嘅精神，即使多次不被人睇好，依然努力以表現證明自己，結果一戰成名，而當上正選後，面對各界質疑佢嘅能力，林書豪亦一力承擔責任，仲以行動令批評者收聲。字裏行間，完全感受到Jeffrey係想借林書豪比喻唐唐。
不過，最出位要數以下呢句，Jeffrey話林書豪將來仲要面對更多「既狼且辣的流言」，擺明係呼應緊日前唐唐自憐遭受到「既狼且辣」嘅攻擊，佢想唔認自己抽緊水都唔得啦！