新界東鄉紳想喺九月立法會選舉自行派隊出選已經唔係秘密，我哋收到消息，鄉議局主席劉皇發同一班來自新界東嘅鄉事領袖，上星期日齊集大埔林村密斟商討大事。據了解，發叔喺會上繼續力撐原居民自行組隊出選，仲話如果組得成，資助一百萬元都冇問題喎。
其實我哋早前已經報道過，發叔為咗令到近年愈來愈疏離嘅原居民團結起來，對新界東鄉紳組隊參選一直樂觀其成，早排仲已經承諾，會捐出五十萬元選舉經費，去到上星期仲加碼到一百萬添。依家鄉事派萬事俱備，搞唔搞得成只睇自己爭唔爭氣。
不過，最近又傳出曾於○八年參選立法會嘅沙田區議員龐愛蘭，未來或會加入沙田地區政團公民力量（公記），藉以增加立法會選舉嘅贏面。新界東局勢微妙，盛傳會代表鄉事派出選嘅韋國洪亦來自公記，如果龐愛蘭真係加入公記，咁公記啲票畀邊個好呢？呢方面就要下回分解喇。