政情：方剛狂數鬍鬚曾短視
本港商舖租金不斷上漲，零售業面臨經營苦況，好似開設時裝連鎖店嘅立法會議員方剛，佢位於中環皇后大道中嘅旗艦店，亦喺前年難敵貴租而遷走。方剛坦言，近年大業主提出租金加幅倍升，令到實力雄厚嘅銀行都無法抵禦租金嘅壓力，其他行業嘅艱苦經營真係可想而知，佢批評財爺只識撥地發展商廈，但欠缺發展商場嘅長遠政策。
方剛又話，港島鰂魚涌某啲工廠大廈，原本租金只要三至四元一呎，但一經「活化」，租金立即飆升至八元一呎，而呢啲廠廈嘅租客多為經營影樓或藝術工作室嘅年輕人，狂加租只會令到鼓勵年輕人創業嘅口號，變成鏡花水月。講開經營時裝零售，方剛話賺錢要訣係只賣女裝，因為女裝不但變化多，兼且女士在購物方面亦較男士闊綽，所以佢話女人嘅錢係好好賺嘅！