政情：深水埗劃新區 建制泛民搶揸莊
區議會將喺下年換屆，各黨派都密鑼緊鼓為選舉做準備同協調，但隨住社會發展，唔少選區都要重新劃分過，其中一個戰況激烈嘅就係目前共有二十三個議席嘅深水埗區議會，依家建制佔十二席，泛民佔十一席，兩派只相差一席，但預料重新劃區後會增加兩個新議席，新選區將會係喺區議會搶奪主導權嘅關鍵。
有地區人士透露，除咗主席之外，建制同泛民喺區議會各佔一半，由於爭拗多咗，會議時間愈嚟愈長，建制派覺得費時失事，窒礙咗議會運作，因此建制派希望攻新區攞多一至兩席，扭轉依家嘅局面，當然泛民亦都唔想失落依家平起平坐嘅優勢。
據了解，其中一個新選區係之前公屋重建嘅蘇屋選區，另一個就有傳會喺幸福選區、「長沙灣四小龍」劃出嚟，指幸福選區將會拆開一半，將星匯居、碧海藍天、新居屋凱樂苑等撥入同一選區，同時隔籬嘅荔枝角中選區人口數字接近飽和，所以估計「四小龍」之一嘅宇晴軒會撥落新選區，但確實嘅規劃仍有待公布。
人選方面，有傳現任幸福選區區議員、民主黨（白鴿黨）鄒穎恒將會隨部分樓宇撥入新選區，而出戰新選區，至於原有嘅幸福選區，聞說就由鄒穎恒「娘家」民協嘅成員接手；建制方面，民建聯社區幹事張德偉已服務幸福選區多年，或會出戰幸福選區，新選區則尚未確定。至於蘇屋選區，預料將係民建聯何坤洲同民協陳銘基對壘。
傳姚松炎再戰鄭泳舜
戰局嘅焦點唔止喺新選區，舊選區方面，近年唔少議員都選擇以「孖寶形式」出戰，以增加勝算，而有傳嚟緊泛民唔止會孖住落區，仲會「圍住落區」。早前就有傳喺立法會九龍西補選落敗嘅姚松炎，有意喺明年轉戰區議會，仲要喺補選勝出嘅民建聯鄭泳舜所屬南昌北選區，實行喺區議會再戰鄭泳舜。
睇番依家五個南昌選區，當中有三個都係屬於建制派，有指姚松炎將會同其他民主派人士結盟，包括民協南昌西選區區議員衞煥南，實行以協同效應方式出戰。不過，鄭泳舜就話無論對手策略係點，佢嘅工作始終如一，會做好社區工作同地區服務，建制派亦都會喺所有區全力以赴，爭取最多嘅票數。