政情：長毛：泛民團結如衣服
民主黨同公民黨自從區選失利後，兩黨都話要同人民力量、社民連劃清界線，玩割席。梁國雄尋日就回應話，鍾意割就割啦，自己無咩所謂，又話泛民團結就好似一件衫咁，當初係為保暖而買，但依家成三十幾度，無必要為着而着咁辛苦。
長毛尋日好晦氣咁同記者講，話當初泛民團結走埋一齊，係希望發揮更大力量，但如果走埋一齊，只會畀人覺得累街坊嘅，咁不如各有各做，無必要夾硬喺埋一齊，所以長毛先用衫嚟形容泛民團結性，話當初買咗返屋企，但依家用唔着，亦無需要勉強。
長毛仲話，既然泛民咁唔鍾意佢，一定要同佢割席，咁不如索性動議譴責佢，因為泛民加建制派，實夠四十票，到時可以名正言順趕佢出議會，到時一定掟唔到雞蛋啦。長毛一直都有諗頭有創意，唔知立法會同僚會唔會考慮佢嘅建議呢？