中環出更：陳李妮賀弟婚 金舖撲龍鳳鈪
最近城中掀起一陣搶金潮，各大金舖嘅飾櫃經常空空如也。博愛醫院副主席陳李妮（Lily）最近就差啲要食驚風散，事關佢唯一嘅細佬李毅（Joe）日前同女友陳曉君（Katie）拉埋天窗，Lily升呢做大姑奶好開心，諗住買對重量級龍鳳鈪送畀新娘。不過，佢喺婚禮前幾日去到金舖，當堂被眼前好似被打劫嘅場景嚇呆，好彩Lily係金舖熟客，預訂後終於成功撲到一對龍鳳鈪，最終有驚無險。
細佬脫「管轄」 要時間適應
細佬結婚，Lily直言心情好複雜，因為兩姐弟自細同媽媽相依為命，媽媽要搵食湊大佢哋，於是Lily身兼父職，兩姊弟一向感情好好。依家細佬搵到好老婆，既開心又唔捨得，笑稱要時間適應細佬已脫離佢「管轄」範圍嘅事實喎！
當晚婚宴極之低調，只擺七圍。創作無數膾炙人口流行歌曲嘅金牌填詞人向雪懷、「霓虹燈大王」第二代接班人譚浩瀚（William）都去沾喜氣。原來Lily同向雪懷相識多年，當佢係亦父亦友嘅前輩，事關喺阿Joe成長過程中，如果遇到Lily唔識教嘅問題就會搵向雪懷求救，始終有啲問題，男人之間至溝通到。
至於William與Lily相識過程幾搞笑，原來十幾年前William為咗理想，放低家族生意，去亞視做監製。Lily幾年後至知William係有錢仔，父係前保良局總理譚華正，六、七十年代照亮香港嘅巨型招牌，幾乎都係佢哋家族生意。
卓妮