政情：鼠王芬倡渡輪變的士
啱啱喺九龍城黃埔區高票連任成功嘅專業會議立法會議員梁美芬，尋日繼續發揮佢死纏爛打嘅本領，喺立法會會議上質問運輸及房屋局局長鄭汝樺（Eva）點解遲遲都唔肯為舊年停辦嘅紅磡至中環同灣仔渡輪航線進行第三次招標。佢嘅死纏爛打都有新意嘅，就係諗到不如將渡輪變成水上的士。
鼠王芬話局長立場被動，所以提出水上的士嘅建議，喺繁忙時間為市民服務，或者配合剛落成嘅紅磡海濱長廊，為兩條航線注入旅遊元素，睇吓可唔可以吸引到營辦商入標。
Eva就話，好明白梁議員緊張紅磡區交通，不過兩條航線過去一直虧損，真係無乜可能繼續營運落去。至於鼠王芬不斷追問嘅旅遊渡輪元素，Eva就話會返去諗諗，唉，睇嚟真係連局長都怕咗佢。話時話，紅磡渡輪航線嘅問題由區議會選舉前砌到眨吓眼選舉都完咗，用埋做立法會選舉嘅議題，都好方便囉。