政情：示威港大校友談從政路

就讀港大社工系、○六年畢業嘅羅健熙，到港大向李克強示威引發嘅不愉快事件經過傳媒廣泛報道後，有人就「起底」話佢係民主黨成員，實情佢畢業後已經入黨，○七年就參選過南區區議會利東選區，最終落敗，但會捲土重來參選嚟緊十一月區選。健熙坦言，自己鍾意對人，中四時已經立志從政，升讀大學後更選讀社工，與服務地區嘅性質好類近。

健熙從政以後，不時會走上街頭，佢坦言家人擔心在所難免，好似去年反高鐵，佢慘中胡椒噴霧，羅媽媽心痛勸佢「唔好咁激啦」，但佢只能好愧咎咁同媽媽講：「後生仔冇事嘅」。從政搵錢唔多，健熙話平時畀唔到好多家用屋企，但幸得家人支持，難怪佢最想多謝嘅，就係令佢放心實現理想嘅屋企人喇。