過往中央提出任何撐港嘅「送禮」措施，都會有人揶揄港府又「伸手」向阿爺攞着數，但由於國務院副總理李克強日前訪港時提出嘅卅六項措施，唔係一早已經通晒天，就係難以惠及基層市民，批評港府做「伸手黨」嘅評論亦相對少咗。不過，煲呔曾尋日喺電台節目《香港家書》中，反而用咗好大篇幅解釋港府並冇向中央「伸手」，聲稱香港只能靠內地「送禮」嘅負面想法已經一掃而空，擺明係此地無銀三百両。
煲呔曾「收咗人禮」心虛不打自招，但對於李克強喺訪港期間，當面對佢作出嘅嚴詞訓斥，包括叫佢「切實做好各方面工作」、「要把握全局，努力化解或減少消極因素，千方百計維護香港經濟社會大局穩定」、以及「切實有所作為，積極幫助市民特別是基層市民排憂解難」等，煲呔曾喺《家書》卻隻字不提，以為自己唔提起大家就唔記得，認真天真。
煲呔曾再係咁Hea做等收工，當領導人嘅訓示係耳邊風，鬼唔望中央痛定思痛，下令要佢心口痛提早落台，咁就真係向香港人「送大禮」喇！