夕陽政府今年七一後陷入空前管治危機，講到底都係同煲呔曾既無能、做事又缺乏遠見有關。講開煲呔曾，除咗佢自己本人外，佢住同辦公嘅禮賓府近日都麻煩多多，前幾日先畀本報揭發，一棵喺禮賓府內嘅台灣相思樹因為生蟲而被砍，點知除咗樹有病之外，原來禮賓府連泳池都冇水呀，陰功。
工業界立法會議員林大輝喺自己通訊上面踢爆，話自己同「五散人」其他成員四月中獲邀去禮賓府作客，發現有錦鯉魚池又有健身室，簡直係動靜皆宜。不過最特別嘅係，大輝發現禮賓府內嘅泳池竟然冇水，直接啲講就係乾塘，都咪話唔邪。
禮賓府係有專人打理嘅大宅，但結果接連出問題，就連棵有二十年歷史嘅樹都受唔住夕陽政府嘅衰氣而受感染，今次仲搞到乾塘添，大宅嘅主人係唔係好有問題先？煲呔曾民望乾塘已經係不爭嘅事實，與其丟低個泳池唔用，倒不如開放咗佢，造福市民好過啦。