政情：阿涂唔見稿累街坊
快將為人父嘅立法會議員涂謹申尋日發生遺失講稿事件，搞到立法會要休會等佢搵，其實絕大多數議員，包括佢啲黨友都已經攞住部iPad發言，都唔明佢點解仲係用緊紙，除咗唔環保，仲會有唔見稿嘅危險。
立法會尋日討論一條有關稅務安排嘅法令，內容都幾技術性，無稿好難臨時爆肚，阿涂一直慷慨陳詞，點知講講吓，佢就發現唔見咗篇稿嘅部分內容，認真 爆，於是要求會議暫停等佢搵番篇稿，結果搵咗幾分鐘至搵得番。
事後我哋問阿涂究竟佢份稿去咗邊？佢笑笑口話原來份稿一直都喺佢個位附近，只係佢嘅助理幫佢將兩篇講稿釘埋一齊，一時間有啲亂，急起上嚟，就更加搞唔清楚。咁佢係咪因為掛住太太肚中嘅小朋友呀？阿涂索性只笑不語，懶係難為情咁，又難怪嘅，今次係阿涂第一次做老竇，多多少少都會有啲緊張，相信大家會體諒，總之唔好有下次就得啦。