政情：吳建民任百人會會長
由本港富豪二代組成嘅「百仁基金」，當初改名都諗過叫做「香港青年百人會」，搞到畀美國百人會質疑佢哋侵權，最終放棄叫「百人會」而選用「百仁基金」，風波平息，雙方更不打不相識。話咁快又幾年，美國百人會日前宣布換上新阿頭，前會長程守宗退下火線，取而代之係華美銀行集團董事及最高執行長吳建民（Dominic）。
Dominic來頭不小，佢任職嘅華美銀行，係全美國以華裔市場為主嘅商業銀行中規模最大嘅一間，唔單止咁，佢仲做過聯合基金會大洛杉磯分會（United Way）慈善募款主席，並創下最高籌款紀錄。Dominic話，喺中美關係新時代，百人會作為促進兩國交流、經濟、政治及社會嘅橋樑作用顯得更重要。
百仁基金主席施榮忻（Jaime）上月出席一個論壇時，曾巧遇前會長程守宗，雙方互笠高帽，Jaime自嘲係「冒牌貨」，程守宗就形容彼此各有特色。如今美國百人會換上新會長，Jaime笑指，百仁基金仲要向百人會多多學習，仲唔排除大家有機會碰面同合作架！