沙朗布朗「勾義嫂」累死湖人
眾所周知，湖人因為內線大將加素失戀而表現跌Watt，間接連累球隊衞冕失敗，粉絲們自然將責任歸咎於這位西班牙天王。不過近日就有美國傳媒替加素抱不平，事關佢哋收到風，原來加素之所以同女友Silvia分手，係因為後者瞞住佢偷食，而男主角仲要係湖人隊友，「入樽狂人」沙朗布朗！
加素分手一事可謂眾說紛紜，早前曾經傳過因為高比拜仁老婆雲妮莎介入，教唆Silvia斬情絲，而導致兩人分手，但blacksportsonline.com日前就踢爆事實並非如此。據悉加素同Silvia一直感情要好，但在季尾階段，加素突然發覺自己一直「長戴綠帽」，原來Silvia已背住男友「劈腿」好一段日子，而男主角就係同加素稱兄道弟嘅沙朗布朗。
灰熊雷霆明決生死
由於沙朗布朗早已成家立室，老婆仲係R&B歌手Monica，所以有指「入樽狂人」同Silvia嘅關係只係ＳＰ （性伴侶），但兩人關係卻已維持接近一季，因此加素除覺得遭女友背叛外，還對自己知得太遲，以及被好友出賣而深深感受到「三重打擊」，試問仲邊有心機打波呢。
加素得知沙朗布朗就係Silvia個「契家佬」後，立即同佢劃清界線，所以湖人上下都清楚兩人冇晒偈傾，太太團首領雲妮莎亦知得一清二楚，有傳狗仔隊所以收到風，就係一向唔妥Silvia嘅雲妮莎私下放風爆大鑊，要讓全世界人知道呢位西班牙美女原來如此水性楊花！
季後賽方面，灰熊尋日在生死戰發揮小宇宙，憑蘭度夫攻入30分，加上成功守住雷霆嘅常規賽得分王杜蘭特，令後者僅奪11分，結果以95比83擊敗雷霆，總成績追成3比3，兩軍將於周一凌晨Game7決一死戰。
本報綜合報道