政情：落選副局蔡海偉執身彩

有足夠空間盡展所長

現年四十九歲嘅蔡海偉，擁有機械工程學榮譽學士同社會工作碩士嘅學歷，九二年加入社聯，曾任社聯復康部、政策研究部等嘅工作，現職社聯業務總監（政策研究及倡議）。社聯主席陳智思同現任行政總裁方敏生尋日一齊宣布，蔡海偉會係社聯新任行政總裁，今年十二月一日履新，任期三年。陳智思話，自從方敏生五月宣布今年年底離任後，就開始進行公開招聘，一共收到十二份申請表，篩選出四位申請人，最後就揀咗蔡海偉，因為佢擁有逾二十年嘅豐富經驗、熟悉現時嘅社福政策、同埋有較強嘅溝通能力。

擔任社聯行政總裁十三年嘅方敏生都話，蔡為人斯文、有正義感，係一名謙謙君子，加上多年擔任社福政策嘅工作，會係一個絕佳人選。咁咪即係話政府走寶？返轉頭其實係蔡海偉執到寶，因為方敏生都做咗十三年，呢份工起碼有足夠嘅時間，畀佢發揮所長。

政府三日前宣布政治委任官員日後要公布親朋戚友嘅私人利益，問舊年差啲入咗政府做副局長嘅蔡海偉會唔會因為咁唔再見問責官員嘅工，佢笑住話自己好基層，對佢無乜影響，不過未來幾年會全心全意喺社聯工作，服務同改善弱勢社群嘅工作，做好同政府、商界同社福界嘅溝通。

唔想見好友佔中被拉

另外，有社工組織話會參加佔領中環，蔡海偉就認為社工嘅核心價值係維護人嘅尊嚴，支持民主正合乎有關價值，覺得佢哋企得前係唔出奇，佢都好支持民主，希望未來幾個月，政府可以就政制發展提出清晰方向。但係佢又話，大家唔希望見到佔中，又話佔中嘅三位發起人係佢好朋友，唔想見到佢哋畀人拉。乜嘢立場，明啦！