政情：朱鼎健三傳聖火好興奮
觀瀾湖太子爺朱鼎健（Ken）熱愛運動，大部分運動項目都有興趣，連帶傳遞聖火佢都義不容辭。由○八年至今四年內，阿Ken先後傳咗三次聖火，包括○八年北京奧運、○九年東亞運動會及稍後舉行嘅深圳世界大學生運動會（大運會）。阿Ken話，每次傳送聖火都一樣咁興奮。
覺得與有榮焉
今次阿Ken以全國青年聯會、香港青年聯會及觀瀾湖三重身份代表，去為深圳大運會傳遞聖火，佢話覺得與有榮焉。佢喺深圳大學傳遞聖火，只係跑咗六十米，同佢平時一星期跑二十公里相比，絕對應付有餘。今次深圳世界大運會總共有一百八十個國家及地區參加，稍後仲有一百八十個學生代表會去阿Ken嘅深圳觀瀾湖比賽添！
現時阿Ken嘅業務已伸展到美國，嚟緊六月佢又要親身去視察當地嘅旅遊地產項目，由於亞洲業務繁重，所以阿Ken去美國都唔可以留得太耐，每次都係留四至五日。
不過，阿Ken笑稱，美國比香港慢十二小時，當係賺多半日時間做嘢喎，咁都諗到，難怪佢經常話工作充滿樂趣喇！