政情：立會足球隊延續不敗
尋日立法會足球隊同一班政府官員及紀律部隊成員鬥波，賽前立會足球隊領隊、資訊科技界議員譚偉豪仲打定輸數，指身兼隊長嘅廠商會議員林大輝因事缺陣，擔心今仗會打破佢哋連續十二場不敗嘅優良紀錄。不過最後佢哋仍以二比一擊敗政府隊，將不敗紀錄延長至十三場，認真威水。
賽後人民力量議員陳偉業（大舊）仲話，佢哋今日踢得咁順，正正係因為大輝唔在陣。佢形容踢中場嘅大輝，係立會足球隊嘅「黑洞」，「踢咩波都要交番畀佢等佢發辦」，仲成日指手畫腳、阻頭阻勢。對於今次又係靠班年輕力壯嘅外援球員入波，一眾議員又係食白果，大舊就自辯：「我條腰幼兩、三吋，入多球三比一添呀！」
立會同政府鬥波，一般都會搵政務司司長主持開球禮，尋日場波就由署理司長孫明揚帶病頂上，好錫身咁輕輕踢咗一下就算數，連波都冇睇，前後唔夠十分鐘就急閃。醫學界議員梁家騮亦只喺上半場踢咗十五分鐘就走頭，仲要係踢住對拖鞋，原來係趕住去同朋友練扒艇。