中環出更：姚明面前洪為民變小男人

Witman日前出席內地一個論壇，以香港代表身份，喺青年領袖圓桌會議上發言。姚明都係講者之一，兩人惺惺相惜，Witman會後捉住七呎六嘅姚明合照。點知一睇，對比實在太大，Witman堂堂男子漢，頓變小男人，非常搞笑。

施榮忻自嘲「冒牌貨」

出席會議嘅仲有唔少富二代，包括百仁基金主席施榮忻（Jaime）、菁英會主席白富鴻及副會長莊家彬等。Jaime巧遇美國百人會會長程守宗，即上前自我介紹，Jaime自嘲係「冒牌貨」，話百人會先係正牌貨。程會長好謙虛，話彼此各有特色，可以多多交流。

香港百仁基金成立之初，曾考慮改名為「香港青年百人會」，但畀美國「百人會」話有侵權之嫌，創會主席李家傑後來將個會正名為「百仁基金」，風波始平息。Jaime今次同程守宗千里相逢，唔打唔相識，世界真細小。