馬刺湖人首戰倒灶
今季季後賽只係戰至第二賽日已爆大冷，西岸一、二哥馬刺及湖人首戰坐擁主場之利下，竟落筆打三更，分別不敵灰熊及黃蜂，係ＮＢＡ自83至84球季以來，季後賽增至16隊角逐後，首次有同岸頭兩號種子在首戰一同輸波，認真羞家！
西岸一哥馬刺早在季後賽開始前，已被球評家預測首圈面對灰熊可能遭逢滑鐵盧，結果首戰缺少受傷嘅真路比利下，大失水準。馬刺在大部分時間領先下，第四節被灰熊超前，本應球隊有機會追平打加時，可惜謝法臣完場前1秒出手嘅三分球「炒粉」，導致馬刺終以98比101飲恨。今場係灰熊歷史上首場季後賽勝仗，此前三次季後賽之旅首圈全遭對手以四比○橫掃。
高比轟34分徒勞無功
除「老八」擊敗一哥外，「老七」黃蜂亦打出今季代表作，作客面對上季總冠軍湖人，全隊僅有3次失誤，平了近21年ＮＢＡ季後賽以來最低失誤次數紀錄。整場波處於下風嘅湖人，在第四節一度追成落後1分，但黃蜂尾段表現穩定，罰球命中率準繩下，湖人採取犯規戰術亦徒勞無功，最終黃蜂贏109比100，打響頭炮。
賽事中曾拉傷頸部嘅高比拜仁攻入34分，但同時亦有5次失誤，而最令人失望嘅係加素，呢位大前鋒雖然戰至血流披面，但全場9次起手僅2中連罰球得8分，最弊係佢今場守唔住黃蜂嘅蘭特利，全場被硬爆之下，讓蘭特利取得17分，成為輸波罪人。至於「蜂王」基斯保羅就貢獻33分及14次助攻，係近20季ＮＢＡ內，第4位球員能在季後賽做出此數據。
本報綜合報道